1-қаңтардан бастап "Трансэнерго" жылу мен ыстық судың құнын айтарлықтай қымбаттатты. Кәсіпкерлер жылу қызметіне есептегіш құрал болмаса, 131 пайызға, құрал қолданылса, 41 пайызға көп төлейді. Тұрғындар үшін жылу қуаты 49 пайызға өсті. Мекеме өкілдерінің сендіруінше, қазіргі тариф алдағы бес жыл сақталады. Коммуналдық төлемдерден түскен қаражатқа "Трансэнерго" жыл сайын жылу құбырлары мен қазандықтарын жөндеуге, арнайы техникаларды жаңартуға міндеттелді. Инвестициялық жобаның құны - 7 миллиард теңге. Компания жылу желілерін қалпына келтіру үшін "Нұрлы жол" бағдарламасы арқылы берілген 3 миллиард теңгені де мемлекетке қайтаруы керек. Ал, қымбат тарифтен құтылу үшін коммуналдық кәсіпорын басшылығы халыққа жылу мен ыстық су есептегіш аспаптарды орнатуға кеңес береді. Қазір 79 мыңға жуық абоненттің 96 пайызында, кәсіпорындардың 36 пайызында осындай құрал бар. Тағы 181 көпқабатты үйден өтініш түскен. Халық "Трансэнерго" мекемесіне 49 миллион теңге қарыз. Берешектер бойынша барлық істер сотқа жолданған. Борышкерлердің басым бөлігі - тұрмысы төмен отбасылар. Ал, қарыздың ең көп мөлшері - 600 мың теңгеден асады.