Автобустар ескірді, жиі сынады, қосалқы бөлшектері қымбат. Жанар-жағар майдың бағасы күнде өседі. Коммуналдық шығындар көбейді. Жұмысшылардың жалақысы мен несие тағы бар. "Автопарктің" ресми өкілі Руслан Жылқаманов тарифті өсіруге осылар себеп дейді. Қалада жол ақысы соңғы рет 2014-жылы 45-тен 55 теңгеге көтерілген. Содан бері өзгерген жоқ. Қазір жолаушыларды 34 бағыт бойынша "Автопарктің" 300 автобусы, 16 бағыт бойынша "Жолаушылар автокөлігі кәсіпорнының" 80 автобусы тасып жүр. Соңғысының көліктері тозып біткен. Күніне 10-20 пайызы бұзылып тұрады. "Жолаушылар автокөлігі кәсіпорнының" бас экономисі Елена Селиверстова компанияның бұрыннан шығынға жұмыс жасап жатқанын, хәлі мүшкіл екенін айтты. Екі жыл бұрын тұрғындарға қызмет көрсеткені үшін "Автопаркке" жылына 700 миллион, "Жолаушылар автокөлігі кәсіпорынына" 200 миллион теңге субсидия беріліп келген. Қазір екі мекеме де мемлекеттен бір тиын алмайды.Бұл мәселеге бүгін қалалық әкімдік түсінік берді. Жол ақысын өсіру туралы сұранысты қарау үшін былтыр қараша айында қала әкімінің орынбасары Нағымжан Алдияровтың жетекшілігімен комиссия құрылған. Оның мүшелері екі рет бас қосып, жолаушы тасымалдаушы компаниялардан кіріс-шығыс жөнінде қосымша мәлімет сұратқан. Қазір комиссия тарифті көтерудің қаншалықты негізді екенін қарап жатыр. Кейін бұл сұрақ тұрғындардың алдында қоғамдық тыңдауға шығарылады.