Бір ай бұрын қалада Пробация үйі ашылған болатын. Ол жерде сотталғандарға әлеуметтік, психологиялық, құқықтық, медициналық көмек беріліп жатыр. Қылмыс жасап, бас бостандығынан айыру жазасы тағайындалмағандар мен жақсы тәртібі үшін мерзімінен бұрын абақтыдан босап шыққандар қазір осы үйді жағалап жүр. Қалалық пробация қызметінің есебінде 1200 адам тіркеуде тұр. Ұрлық жасап, жол-көлік оқиғасы кезінде жүргіншінің өліміне себеп болғандар мен алаяқтығы үшін сотталғандар алдымен психологиялық тест тапсырып, бос жұмыс орындарымен танысады. Пробация үйі күніне 40-50 адамға көмек көрсете алады. Бұрын мерзімінен бұрын босап шыққандар қайда барып, кімнен көмек сұрарын білмесе, енді бір үйдің ішінде барлық маманнан кеңес ала алады. Пробация үйінде психологиялық көмек беріледі. «Ақ Сұңқар» психодиагностикалық кешеніндегі сұрақтар сотталушылар жиі кезігетін мәселелерге орай құрастырылған. Мұнда кейбірі 80-нен астам сұраққа, енді біреуі тесттегі 300 сұраққа жауап береді. Сотталғандардың көбі алдымен жұмысқа орналасып, табыс табуды ойласа, кейін ата-ана мен туған-туыстың көзқарасымен күрес жолын іздейді.