Ақтөбедегі авиажөндеу зауытының болашағы бар. Ол үшін тапсырыс санын ұлғайту шарт. Бүгін өндіріс орнын аралаған ҚР Төтенше жағдайлар министрі Юрий Ильин осылай деді. Жұмысы тұралап қалған "№406 Авиажөндеу зауытының" мәселесі қалай шешілмек? Ел үшін қажеттілігі бар ма? "№406 Авиажөндеу зауытына" биыл 83 жыл. Кезінде бүкіл ТМД елдеріне қызмет етіп, гүлдеп тұрған зауыттың қазіргі жағдайы мәз емес. Жұмыс қуаттылығы азайған. Айына небәрі 1-2 ұшақ құрастырып, жылына 4 тікұшақ қана жөндейді. Штат қысқарған. Зауытта әзір үш цех жұмыс жасап тұр. Қалғаны тапсырыс көлемінің аздығына байланысты тоқтатылған. Ендігі бар үміт Ресей нарығына шығу, дейді кәсіпорын басшылары. Ақтөбелік зауытта құрастырылатын бұл тікұшақтар 4 тоннаға дейін жүк тасымалдауға қауқарлы. Іздеу-құтқару жұмыстарында таптырмас құрал. Өрт сөндіріп, алқапты улауға да пайдасы зор. Алайда жергілікті органдардан сұраныс шамалы. Өңір басшысы Оңдасын Оразалин алдағы шегіртке улау науқанына жергілікті тікұшақтарды жұмылдыру мәселесін алға тартты. Ал төтенше жағдайлар министрі болашақта зауыттың тағдырына оң қозғау болады деп сендірді. Тапсырыстың азаюы техниканың жетіспеуінен, дейді кәсіпорын басшылары. Ал Ан-2 ұшағы мен МИ-2 тікұшағына қосалқы бөлшектер Польшадан жеткізіледі екен. Қазір баға шарықтап тұр."№406 Авиажөндеу зауыты" Ми-2 тікұшағы мен Ан-2 ұшағын жөндеу, жаңғырту жұмыстарымен айналысады. Сондай-ақ, оларға техникалық қызмет көрсетеді. Биыл кәсіпорын Ресей сертификатын алды. Қазір осы елдің бізге жақын орналасқан облыстармен келіссөздер жүргізіп жатыр.Атап айтсақ, Орынбор, Челябі, Саратовтан тапсырыс күтуде.