Бірінші маусымнан бастап ауыл шаруашылығы мақсатындағы жер учаскелері аукционға қойылады. Бұл туралы бүгін шаһарымызға «100 нақты қадам» Ұлт жоспарын іске асыруға бағытталған жұмыстарды түсіндіруге келген ҚР Ұлттық экономика вице-министрі Қайырбек Өскенбаев мәлімдеді. Мемлекет бұрын келісім шартқа отырғандарға қатысты талаптар мен ережелерді бұзбайды. Кәсіпкерлер бұрын жер учаскесін 49 жылға жалға алса, олар сол күйі қала береді. Ал сол жалға алған жерін сатып аламын десе, оған да жол ашық. Кадастрлық бағасы да өспейді. Облыста 25 миллион гектар ауыл шаруашылығы жері бар. Оның 1 миллион гектары егістікке арналған. Кәдеге жаратылмай, өз құнары мен маңыздылығын жоғалтып жатқандары жетерлік. Сондықтан, жерді тиімді пайдалану мақсатында оның құжаттары дайындалып, 189 мың гектар жерді аукционға салу жоспарда бар. Өңір басшысының айтуынша, «Агробизнес-2020», «Құлан», «Сыбаға», «Алтын асық», «Ырыс» бағдарламалары арқылы ауыл шаруашылығын дамытып, алда өз-өзімізді тамақпен қамтамасыз ету мақсаты тұр. Оған қол жеткізу үшін жалға алынған ауыл шаруашылығы мақсатындағы жерлерді пайдалану бойынша түрлі кедергілер алынып, банкке кепілге беру мүмкіндіктері қарастырылады. Осыған орай, өңір басшысы Бердібек Сапарбаев аудан әкімдеріне тұрғындарға толық мәлімет беруді тапсырды.