Бүгін облыстық мәслихат депутаттары 2016-2018 жылдарға арналған облыстық бюджетке өзгертулер мен толықтырулар енгізді. Өңір үшін республикалық қазына мен Ұлттық қордан 25 миллиард 639 милллион теңге қарастырылған. Бұл қаржының 9 миллиард теңгесі "Нұрлы жол" бағдарламасы арқылы келіп отыр. Әсіресе, білім саласының бағы жанды. Биыл Мұғалжар ауданы, Қандыағаш қаласында 600 орынды мектеп салынады. Бұл тозығы жеткен білім ордасының орнына бой көтереді. Мектеп құрылысына 809 миллион теңгеден астам қаржы бөлінді. Облыстық мәслихат депутаттарын өндіріс орындарын субсидиялау, жұмысшы жастарға арнап жатақхана салу жайы қызықтырды. Алғашында Маресьев көшесінде саябақ салу туралы айтылғанымен, кейін нақты орны әзірге белгісіз болып шықты. Облыс әкімі Бердібек Сапарбаев онсыз да күйі қашқан облыс орталығындағы жасыл желектің қырқылмайтынын айтты. Сонымен қатар, "Гүлдене бер, туған ел" акциясын қолдауға 300 миллион теңге, облыстық балалар ауруханасының кардиоорталығына аппарат алу үшін 270 миллион теңге, мәдени іс-шараларға 125 миллион теңге бөлінді. Алдын ала комиссияда талқылап, жіліктеп тастаған халық қалаулылары облыстық экономика және бюджетті жоспарлау басқармасының басшысы Рузия Айдашеваның бар ойын құптап, жақтап дауыс берді.