Ал "Нұр Ақтөбе" ауданына қатынайтын №2 қоғамдық көліктердің уақыт арақашықтығы ұзақ, сыйымдылығы аз. Аудан тұрғындары осылай деп наразы. Бүгін түске дейін №2 бағыттағы қоғамдық көліктің жүрісінен еш мін таппадық. Арақашықтығы 10-15 минуттан жүйткіп жатыр. Шағын автобустарға сыймай жатқан жан болмады. Аялдамада да адам қарасы аз. Алайда, ертемен жұмысқа баратын немесе балаларын мектеп пен балабақшаға таситын тұрғындар үшін таңғы сағат 7 жарымнан тоғызға дейін қоғамдық көлікке міну мұң. Үлгерсең, діттеген жеріңе уақытында жетесің, үлгермесең, кешігуіңе тура келеді, -дейді тұрғындар. Жұмыстан кешіккісі келмейтіндер мұндай кезде дәурені жүретін таксилердің қызметіне жүгінеді. Құны адам басына 200 теңге. Шағын автобустар жиі бұзылады. Тұрғындар бұған да наразы. Қыстың күндері тіпті есіктері ашылмай қалатын кездер жиі болады. Ал, №2 бағыттағы қоғамдық көлік тиесілі "Автопарк" ЖШС-нің басшылығы түрлі қиындықтардың қыс мезгілінде болғанын жасырмайды. Қазір барлығы қалыпты деп отыр. Сондықтан "Нұр Ақтөбе" ауданына қосымша қоғамдық көліктер жіберу әзірге жоспарда жоқ. "Нұр Ақтөбе" ауданындағы үйлерге тұрғындар әлі де қоныстанып жатыр. Демек халық саны өсе түседі деген сөз. Қоныстанушылардың дені жас отбасылар мен бюджеттік мекемелердің қызметкерлері.