Мұғалжар ауданының жері құнарсыз. Коммуналдық желілер қызметі қажетті деңгейде емес. Экологиялық ахуалы да сын көтермейді. Бүгін журналистер Мұғалжар ауданының әкімі Серік Шаңғұтовты сұрақтың астына алды. Ақтөбе ақпарат орталығында баспасөз мәслихатын өткізген әкім проблемалардың шешіліп жатқанын жеткізді. Әсіресе Мұғалжардың коммуналдық саласына қатысты мәселе көп. Қандыағашта жеті, Ембіде 3 көше асфальтталады. Сараптамадан өтті, жобалық-сметалық құжат әзір дейді әкім. 995 миллион теңге қажет екен. Ауданның бәлесіне айналған тағы бір өзекті проблема теріс діннің жетегінде адасқандар. Былтыр осындай 280 адам бақылауда тұрған болса, биыл тізім 270 болып қысқарған.
Журналистер Мұғалжардың экологиялық ахуалы жөнінде сұрады. Зауыттар тарататын жағымсыз иіспен күресіп жатырмыз деді Серік Шаңғұтов. Сондай-ақ, бизнесмендерден пайдаланусыз қаңырап тұрған ғимараттарды қайтаруға да күш салынып жатқан көрінеді. Мұнай компанияларынан 5 қатарлы бірнеше ғимарат қайтарылған. Қалғанын мемлекет меншігіне өткізу үшін компания директорлар кеңесімен келіссөздер жүргізіліп жатыр. Ал әкім өзі отырған үйдің мемлекеттен баяғыда жеке меншікке заңды жолмен аударылғанын айтты. Серік Шаңғұтов отбасыммен ол үйді жалдап отырмын деді. Мұғалжар ауданының жері құнарсыз. Облыс әкімінің тапсырмасымен суармалы жерлерді көбейту қолға алынған. Баспасөз мәслихаты кезінде тілшілер аудандағы өндіріс орындарынан айлап жалақы ала алмай жүрген жұмысшылардың арызын жеткізді. "Темір Сервис", "Базальт-А" ЖШС-і еңбекақы төлеуді кешіктірген. Жағдайға қанықпын деген әкім, ол мәселе де шешіліп жатыр деді.