"Трансэнергоның" тарифтері негізсіз деп санайтын екі жеке кәсіпкердің шағымы сотта қаралып жатыр. Алғашқы тыңдау өтті. Коммуналдық мекеме мен облыстық табиғи монополияларды реттеу департаментінің өкілдері бүгін тарифтердің кімге қалай есептелетінін тағы бір мәрте түсіндірді. Жылуға ақшаны үнемдеудің бір ғана жолы бар - жалпыүйлік жылу есептегіш құралын орнату. "Тұрғын үй коммуналдық шаруашылық қоры" ақтөбеліктерге бұл аспапты несиеге қондыруды ұсынады. Құны 700 мың мен 1 миллион теңгенің аралығында болатын құралды 4 жылға бөліп төлеу мүмкіндігі берілген. Мысалы, жалпы аумағы 4 мың 395 шаршы метр, 99 пәтері бар үйге жылу есептегіш құралын орнату 836 мың теңгеге шығады. 1 бөлмелі пәтерден 6657 теңге, 2 бөлмелісінен 8178 теңгеден жиналады. Бұл әдіс жеке кәсіпкерлерге де тиімді. Мәселен, Әбілқайыр хан даңғылы бойындағы дәріханалардың бірі жылу үшін өткен жылдың қараша айында есептегіш құралсыз 10 мың теңге, жаңа тарифпен 27 мың теңге төлеген. Ал, есептеу аспабы бар дәріханаға жылу қызметі үшін қарашада 7 мың теңгенің, қаңтарда 13 мың теңгенің түбіртегі келген. Соңғысы 14 мың теңге үнемдеп отыр. Кеңсесінде есептегіш құралы жоқ, жылудың ақысы екі есе артып кеткеніне наразы екі жеке кәсіпкердің ісі сотта қаралып жатыр. Шешім екі айдан кейін шығарылады. Қазір Ақтөбеде 291 көпқабатты үйде жылу есептегіш құралы бар. Тағы 180-і аспапты қойдыруға өтініш берген. "Трансэнерго" мамандары жыл соңына дейін 454 үйді қамтуды жоспарлап отыр.