Бүгін Ақтөбе автожол колледжінде өңірдің көлік жолдарына жауапты мамандары бас қосты. "Жол активтері ұлттық сапа орталығы" республикалық мемлекеттік кәсіпорны ұйымдастырған семинар-сабақ барысында жол сапасын жақсарту үшін аталмыш салада білікті кадрлар санын арттыру мәселесі қозғалды. Семинарға 12 ауданның әкімдері мен олардың орынбасарлары, тұрғын үй- коммуналдық шаруашылығы, сондай-ақ, жолаушылар көлігі және автомобиль жолдары бөлімдерінің басшылары қатысты. Елімізде жүргізілген сараптама нәтижесі бойынша өңірлердің тұрғын үй- коммуналдық шаруашылығы мен автокөлік жолдары басқармаларында жұмыс істейтін қызметкерлерінің тек 10%-ы ғана автожол саласының мамандары. Осыған орай жол активтері сапасының ұлттық орталығы мамандары әр өңірді аралап, жергілікті атқарушы органдардың қызметкерлеріне семинар-сабақ өткізуде. Бүгін арнайы топ Ақтөбе автожол колледжінде 12 ауданның және облыс орталығының аталған саладағы қызметкерлерімен кездесу өткізді. Осылайша, мамандар автокөлік жолдарының сапасына әсер ететін білікті кадрлар санын арттырмақ ниетте. Семинар-сабақ барысында автожолдардың сапасына жауапты жергілікті атқарушы органдардың қызметкерлеріне салынған жолдардың сапасын анықтау бойынша түсіндірме жұмыстары жүргізілді. Тәжірибеде жол сапасын тексеретін ұлттық орталықтың арнайы құрылғылары қолданылды. Бүгінге дейін орталық мамандары тек қаладағы көлік жолдарының сапасын тексеріп келді, енді мұндай сараптама аудан жолдарына да жасалатын болады. "Жол активтерінің ұлттық сапа орталығы" облыстық филиалы 2019 жылы құрылып, 2020 жылы қызметін бастаған еді. Өткен екі жылда орталық мамандары қалада жөндеу жұмыстары жүргізілген 300 жол телімін тексерді. Сараптамаға 5000-нан астам жол- құрылыс материалдарының сынамасы алынып, олардың 800-і жарамсыз деп танылды. Нәтижесінде жол жөндеген бірқатар мердігер ұйымдарға қатысты хаттамалар толтырылып, тиісті мекемелерге жолданды. Атап өтейік, ұлттық сапа орталығы жаңадан салынып немесе жөнделіп жатқан жолдардың сапасын тек тексерумен ғана шектеледі. Мердігер ұйымдардың жұмысына қатысты анықталған заңбұзушылықтар жөнінде мемлекеттік тапсырыс берушіге мәлімет береді. Алайда, оларға қатаң талап қою немесе заң жүзінде жауапқа тарту орталықтың құзыретіне жатпайды. Сондықтан болар қаладағы жолдардың сапасы әлі де сын көтермей келеді. Ал ақтөбеліктер жол сапасына шағым айта-айта жауыр болған. Жол сапасын тексеретін мамандардың айтуынша, орташа жөндеу жұмыстары жүргізілген кем дегенде 5 жыл, ал, күрделі жөндеуден өткен көше жолдары 8 жыл жарамды болуы керек. Алайда, біздің шаһарда күзде төселген асфальт көктемде қармен бірге еріп кетеді. Бұл көрініс жылма-жыл қайталана береді. Ал, коммуналдық қызметтің мамандары бұл мәселені шешуге асығар емес.