Ақтөбеде Ресей, Оңтүстік Корея, Түркия мен еліміздің үздік ауруханаларынан келген дәрігерлердің қатысуымен халықаралық симпозиум өтіп жатыр. Бүгін симпозиум аясында Сызғанов атындағы ұлттық хирургия орталығының трасплантологі бүйрек ауыстыру отасын жасады. Бұл жолы анасы баласына бүйрегін берді. Науқас 30 жастағы ер азамат. Ал оған донор болған анасы 58 жаста. Бұл биыл бүйрекке жасалған алғашқы ота. Күрделі операцияны Сызғанов атындағы ұлттық хирургия орталығының директоры Болат Баймаханов жасады. Ол өз командасымен келіп, ақтөбеліктерге шеберлік класын өткізді. Ал ертең дәл осы ауруханада Оңтүстік Кореядан келген дәрігер Кванг Гунг Ли мен хирург Жақсылық Досқалиев бауыр ауыстыру отасын жасайды. Бұл жолы апасы сіңлісіне бауырының 70 пайызын беруге дайындалып жатыр. Ал облыста әлі ондаған науқас дәл осындай сәтті күтіп жүр. Бауыр, бүйрек отасына қаржы республикалық бюджеттен бөлінеді. Облыстық аурухананың бас дәрігері Самат Данияровтың айтуынша, бір адамның бауырын ауыстыруға 25 миллион, ал бүйрегін алмастыруға 4 миллион 400 мың теңгеден астам қаржы жұмсалады. Бұл шығынның бәрін мемлекет өзі өтейді. Жергілікті дәрігерлер трансплантация саласын дамыту үшін өткен жылы Оңтүстік Кореяға барып, тәжірибе жинап келді. Бұл жұмыс биыл да жалғасын табады.