Бақылау мен қадағалаудың қолданыстағы жүйесі білім беру мекемелеріндегі тамақтануды ұйымдастыруды толық бақылай алмайды. Бүгін денсаулық сақтау вице-министрі Алексей Цой осындай мәлімдеме жасады. Оның мәліметінше, елде соңғы үш жылда жыл сайын мектеп асханаларының 34 пайызы, яғни 1900-ден көбі тексеруден тыс қалады. Қазақстанның білім мекемелеріндегі асханаларды жалға алатындардың 80 пайыздан көбі жеке кәсіпкер. Ал, олар үшін арнайы заң бар. Жұмысын бастағаннан үш жылға дейін жалға алушылардың жұмысын тексеруге тыйым салынған. Мамандар мектептердегі ас блоктарын жоғары эпидемиялық маңыздағы, қауіптілік деңгейі жоғары нысандарға жатқызады. Ал, қалалық білім бөлімінің мамандары бүгінге дейін мектеп асханалары мен тақтануға қатысты ата-аналар тарапынан ешқандай шағым түспегенін айтады. Шаһардағы 80 мектептің 79-ында балалар ыстық тамақпен қамтылған. Қаладағы №11 орта мектеп-гимназияның асханасы өзге мектептерге үлгі. Мұнда бала денсаулығына зиянды тағамдар мен газдалған сусындар сатылмайды. Балаларға берілетін тағамдар мәзірін ата-аналар бақылайды. Асханада барлығы таза. Мектеп директоры Ғалия Ізбасқанованың сөзінше, асхананы жалға алушыларға еш шағым жоқ. Санитарлық ережелерге сай жұмыс істейді. Аспаз ауысқалы тамақтары да дәмді. Денсаулық сақтау вице-министрі Алексей Цойдың мәліметінше, асханаларды кенеттен ешкім тексере алмайды. Тексерудің жүргізілетіні 1 ай бұрын хабарлануы қажет. Ескерткеннен кейін кәсіпкерлер тексеру басталғанға дейін кемшіліктерді жойып, тыйым салынған заттарды сатылымнан алып тастайды. Сапасыз, мерзімі өткен азық-түлік өнімдері сөреден алынып, санитарлық кітапшасы жоқ қызметкерлер жұмысқа шықпайды. Тексеруден кейін ішкі бақылау қайта әлсірейді.