Шаһар басшысы Бекбол Сағын бүгін қалада осы жылы атқарылатын шаруалар жайын қоғамдық кеңес алдында айтып берді. Әкімдік биыл бұрын балабақша болған ғимараттарды қайтару, аулаларды жөндеу және халыққа жер телімдерін беру жұмыстарын жалғастырады. Жер кезегінде қазір қала бойынша 100 мыңнан астам адам тұр. Биыл 2005-жылы өтініш берген 2 мыңнан астам адам 10 сотық жерін рәсімдейді. Коммуналдық желілері түгел тартылған аудандар қала маңында аз болғандықтан, жер беру процесі кешеуілдеуі мүмкін. Қала әкімдігі биыл бүлдіршіндерге бұрынғы бақша ғимараттарын қайтаруды жалғастырады. Бекбол Сағынның жоспары бойынша балаларға қайтарылатын үш нысанның бірі - 8-ықшам аудандағы қалалық жұмыспен қамту және әлеуметтік бағдарламалар бөлімі орналасқан ғимарат. Бұдан бөлек, қаладағы 20 мектеп пен 8 балабақшаны жөндеу үшін жергілікті бюджеттен 600 миллион теңге қарастырылады. 500 миллион теңгені әкімдік көп қабатты үйлердің аулаларын жөндеуге жұмсамақ. Биылғы жоспарға 100 аула кірген. "Нұр Ақтөбе" ауданындағы 3-4 ықшам аудандарға инженерлік желілер жүргізу үшін республикалық қазынадан қосымша 1 миллиард 600 миллион теңге бөлінеді. Бұл ауданда 1 мың 725 пәтерлі 9 үй салынады.