Елге 18 жыл бұрын оралған қандасымыз 10 соттық жер ала алмай жүр

Қандасымыз Тұрсынбақи Омаров 18 жылдан бері өзіне тиесілі 10 соттық жерге қол жеткізе алмай жүр. 2007 жылы Қарақалпақстаннан көшіп келген азамат сол жылы жер кезегіне тұрыпты. Содан бері 20 жылға жуықтады. 2020 жылы "2007 жылы кезекке тұрғандарға жер учаскесін беріп жатыр" дегенді естіген 74 жастағы ақсақал жер бөліміне барған. Бірақ карантиннің салдарынан кіре алмапты. Айтуынша, өзіне дейін кезекке тұрғандар жер алып алған. Тұрсынбақи ағай мен Ақшагүл апайдың 4 баласы, 9 немересі бар. Екеуі де зейнетте. Мына жерді 2010 жылы сатып алып, 5 жыл бойы үй салған. Шаңырағында үш келін бүгінге дейін бірге тұрыпты. Жуырда үлкен ұлын 6 баласымен жалдамалы пәтерге шығарған. "Баспанамыз тар" дейді Ақшагүл Самұратова. Әкімдікке мәселесін айтып, бірнеше рет барған. Алайда, нақты жауап ала алмапты.
Қалалық жер қатынастары бөлімінің мамандары Тұрсынбақи Омаровтың жер кезегіне 2007 жылдың қазанында тұрғанын растады. Өтініші "қандас азамат" мәртебесімен есепке алынып, тіркелген. Жалпы 2007 жыл бойынша кезекте 17 900-ден астам және «қандас азамат» мәртебесімен 1215 азамат тұр. Ал, 2014 жылдан 2021 жылға дейін жеке тұрғын үй құрылысы үшін 29 240 жер учаскесі 2003-2007 жылдар аралығындағы кезекте тұрған азаматтарға бөлініп берілген.
Жер учаскелері инженерлік-коммуникациялық желілермен қамтамасыз етілгеннен кейін 2007 жылы кезекке тұрған азаматтарға жер учаскелерін бөлу жұмыстары қайта жалғасады. Қазір 166 929 ақтөбелік жер кезегінде тұр. Әр азаматқа 10 сотық жер беру үшін алаңдар инженерлік желілермен қамтамасыз етілуі тиіс. Ал туған жерге көшіп келіп, азаматтығын алған ағайынның күтуден басқа амалы жоқ.

Количество показов: 99
Дата создания: 19.07.2025 06:42:34