Бүгін - "Ақтөбе радиосының" туған күні

Бүгін - "Ақтөбе радиосының" туған күні. Бұқаралық ақпарат құралы 1999 жылдың 8-желтоқсанында құрылған. Осы уақыттан бастап, радио қызметкерлері «Біздің қаламыздың радиосы» деген ұранмен қызмет атқаруда. «Ақтөбе» радиосы 101.4 FM толқынында эфирге шығады. Тыңдармандар күнделікті саяси ақпараттан бастап, көңіл көтеретін бағдарламаларға дейін ести алады. Ақтөбе радиосы алғаш рет эфирге 1999-жылы 8-желтоқсанда шықты. 26 жылдан бері үзіліссіз хабар таратып келеді. Осы уақыттың ішінде форматы мың құбылған радио өзінің бағытын тапты. Қазір шығармашылық ұжым қала тұрғындарына ең жедел ақпараттар, ең жаңа әндер және ең қызық бағдарламалар ұсынып жүр. Тілшілер сағат сайын соңғы жаңалықтарды бірінші болып тыңдарманға жеткізуге тырысты. Радионың жаңалықтар қызметі тәулігіне 10 рет қазақ және орыс тілдерінде хабар таратады. "Сазды сәлем" құттықтау сазды бағдарламасымен көпшіліктің жүрегінен орын алды. "Көңілді кеш", "Қала сізбен байланыста" атты әзілі аралас интерактивті шығарылымдар ақтөбеліктердің сүйікті радиохабарына айналған. Ай сайын қазақ, орыс тілдерінде 10 шақты бағдарлама шығады. Спорт, денсаулық, мәдениет пен авто-жаңалықтар тыңдармандардың сүйіп тыңдайтын бағдарламалары. Алғашқы жылдары эфирден берілетін әндерді де радио қызметкерлері сараптан өткізіп барып тыңдарманға ұсынуға тырысты. Жастар үшін арнайы жаңа әндер радиодан көп берілді. Осылайша ашыла сала Ақтөбе радио мыңдаған тұрақты тыңдарманды өзіне қарата білді. Атқарушы директор Сергей Довгалюк атап өткеніндей, радиода кері байланыс желісі жақсы дамыған. Тыңдармандар күніне бірнеше мәрте телефон арқылы тікелей эфирге шығып, қала жолдарындағы ахуал туралы мәлімет бере алады, жақын-жуықтарына сәлем жолдап, қуанышты сәттерімен бөліседі. Туған күнінде радио ұжым күні бойы тыңдарманның құттықтауын қабылдап, ойындар өткізді. Алда тәуелсіздік және жаңа жыл мерекелері. Туған күнін тойлаған "ақтөберадиолықтар" енді сол екі мейрамға дайындалады.
Количество показов: 10
Дата создания: 09.12.2025 09:02:31