Аяқсыз қалған құрылыс тұрғындардың бас ауруына айналды
Шаһардағы "Нұр Сити -1" шағын ауданындағы жол мәселесі тұрғындарды әбден қажытқан. "Жаңбыр жауса болды, аула іші мен көшелер батпаққа айналады" дейді тұрғындар. Берік Әбдірахмановтың мұнда көшіп келгеніне бір жыл болған. Сол уақыттан бері жағдай өзгеріссіз. Үйлерінің маңынан басталған құрылыс жұмыстары аяқсыз қалып, кезінде қалған арматуралар әлі күнге дейін алынбаған. Әсіресе, бұл мәселе балалар мен қарттарға қиындық туғызатыны анық. Оның айтуынша, балшыққа батқан көшелермен жүру қауіпті әрі қолайсыз. Оған қоса, жауын-шашын да жиілеп кетті. Тұрғындар мәселені айтып, бірнеше рет тиісті мекемелерге хабарласқан. Алайда, құр уәдемен шығарып салған шенділер мәселені шешуге қауқарсыз. Жергілікті халық жолды жөндеп, қауіпті арматураларды алып тастауды сұрайды. Ал, мамандардың айтуынша, мердігер ұйым қосымша қаржы қажет екенін айтып, жұмысты толық аяқтамаған. Қазіргі таңда Есет батыр тұрғын алабындағы №51 үйдің ауласын абаттандыру жұмыстарының аяқтау бойынша жобалық-сметалық құжаттарға өзгерістер енгізу үшін тиісті мекемелерге хаттар жолданған. Жұмысты жалғастыру мәселесі әлі де қаралып жатыр. Жауапты мердігер -«Ақтөбе Кап-Рем-Строй» компаниясы. Ал тапсырыс беруші – қалалық құрылыс бөлімі. Айта кетейік, бұл жоба 2018 жылы басталған.Количество показов: 5
Дата создания: 06.05.2026 07:28:03
