Жаңақоныс тұрғын алабында жаңа мәдениет үйі ашылды
Жаңақоныс тұрғын алабының тұрғындары үшін жағымды жаңалық. Енді жергілікті жұртшылық ән айтып, би билеп, түрлі шығармашылық үйірмелерге қатыса алады. Қаладағы тағы бір тұрғын қалашықта түрлі іс-шаралар мен шығармашылық кештер өткізілетін орын бой көтерді. Жаңа мәдениет үйі ашылды. Заманауи ғимарат тұрғындардың бос уақытын тиімді өткізуіне және өнерге деген қызығушылығын дамытуға серпін бермек. Жаңа өнер ордасы 100 адамға арналған сахнамен жабдықталған. Сондай-ақ мәдениет үйінің ішінде үйірмелерге арналған арнайы кабинеттер қарастырылған. Ән мен би өнеріне, қолөнерге қызығатын тұрғындар өз қабілеттерін шыңдай алады. Мәдениет орталығының бір ерекшелігі драматургия саласына басымдық берілуінде.Тұрғындар бұл қуанышқа ортақтасып, мәдениет үйінің салтанатты ашылуына арнайы келіпті. Өнерпаздардың өнерін тамашалап, дәстүрге сай шашу шашып, мәз- мейрам болды. Нәзік жандылар қазақтың ұлттық киімдерін киіп, іс-шараның көркін одан сайын аша түскен. Мәдениет үйінде кітапхана да бар. Қорында 5 мың кітап жинақталған. Бұл - кітап оқуға құмар жандар үшін таптырмас мүмкіндік. Жаңа мәдениет ошағы әр жастағы тұрғындарға арналған. Алдағы уақытта мұнда балалар да, жастар да, ересектер де түрлі үйірмелерге қатыса алады. Қыс мезгіліне дейін қатысушыларды тіркеу жоспарланған.
Количество показов: 18
Дата создания: 28.10.2026 09:08:33
