Ақтөбе облысында былтыр табиғи және техногендік сипаттағы 63 төтенше оқиға тіркелген, бұл 2011 жылмен салыстырғанда 7 пайызға аз. Қайғылы жағдайлар кезінде 49 адам қаза болып, 76-сы түрлі жарақат алды. Ақтөбелік құтқарушылар үшін ұлу жылы оңайлықпен өткен жоқ. Ақпанның алғашқы күнінде Махамбетов көшесіндегі пәтерде жарылыс болып, төтенше жағдайлар департаменті қызметкерлері біраз дүрлікті. Сәуірде Қонаев көшесіндегі көпқабатты тұрғын үйдің үш пәтері жанды. Мамырда саяжайлық лашық түгі қалмай өртенді. Тамыздың бір түнінде өрт сөндірушілер Шәйкенов көшесіндегі №51 үйдің шатырынан шыққан отты ауыздықтауға жүгірді. Тізе берсең, көп. Соның өзінде статистика былтыр тіркелген төтенше оқиғалар саны бұрнағы жылдан аз екендігін көрсетеді. Бір жылдың ішінде облыста 693 өрт оқиғасы болып, 15 адам қайтыс болған. Оттан келген шығын 296 миллион теңгені құрады. Өрттің сипаты әр түрлі. Негізінен тұрғын жайлардан шыққан - 471 жағдай. Сауда нысандарында - 16, қоймаларда 5 өрт дерегі тіркелген. 12 айдың ішінде 114 көлік отқа оранды. Мамандар өрттің шығу себептерінің үш нұсқасын алға тартады: абайсызда шыққан өрт, қасақана от қою және пеш, газ жабдықтарын пайдалану кезінде қауіпсіздік ережелерін сақтамау. Жалпы, құтқарушылар өткен жылы 2 мың 605 шақыртуға барып, 323 адамға көмек берген. Шұғыл шақыртулардың басым бөлігі - әлбетте, өрт сөндірушілердің еншісінде.