Хромтау ауданында өндіріс көлемі артқан

Хромтау - облыс экономикасына елеулі үлес қосып отырған өндірісті аудан. Биылғы тоғыз айда мұндағы өнеркәсіп өндірісінің көлемі 654 миллиард теңгеге жеткен. Өңдеу өнеркәсібі қарқын алып, өндіріс көлемі 32 миллиард теңгені құраған. Ауданда жасыл энергетиканы дамытуға да айрықша көңіл бөлініп отыр. Биыл жалпы қуаты 100 мегаватт болатын екі жел электр станциясы іске қосылды. Ал қуаты 300 мегаватт болатын тағы бір станцияның құрылысы басталған. Жобаға 135 миллиард теңге инвестиция тартылып, оны келесі жылы пайдалануға беру жоспарланып отыр. Экономикалық өсіммен қатар, тұрғындарға қолайлы жағдай жасау да маңызды. Әсіресе, жол сапасы - көпшілік үшін өзекті мәселе. Биыл ауданда ауылдарға кіреберіс жолдарды жөндеу және елді мекендердің ішкі көшелерін жаңарту көзделген. Жалпы ұзындығы 110 шақырымнан асатын жолдарға 3,8 миллиард теңге бағыттау жоспарланып отыр. Ал Хромтау қаласындағы 22 шақырым жолды жөндеуге 2,4 миллиард теңге қарастырылған. Әлеуметтік салада да бірқатар жоба жүзеге асырылуда. Хромтау қаласында ЕRG компаниясының қаражаты есебінен 1,4 миллиард теңгеге жаңа бассейн салынып жатыр. Оңғар, Тамды және Никельтау ауылдарында дәрігерлік амбулаториялардың құрылысы жүргізілуде. Бұған қоса, аудандық ауруханаға жапсаржай салуға 1,9 миллиард теңге бөлінген. Қалада спорт және балалар алаңдары орнатылып, саябақтар мен тұрғын үйлердің аулалары абаттандырылуда. 
Количество показов: 9
Дата создания: 30.10.2026 08:21:25