Қазақстан халқы тілдері күні қарсаңында қалада "Жұмадағы жыр" әдеби алаңы өтті
"Жұмадағы жыр" әдеби алаңында қара өлеңге жаны үйір қауым бас қосты. Байқауға жас ақындармен қатар, орта және аға буын өкілдері де қатысып, өзара бақ сынады. Әдеби кеште әр буынның өкілдері жыр оқып, қара сөзге шешендіктерін ортаға салды. Алғашқы кезеңде қатысушылар тақырыптық туындылар ұсынып, жазу шеберліктерін көрсетті. Келесі кезең "Ақынға сыр" деп аталып, бұл бөлімде қатысушылар көрермендердің сауалдарына жауап берді. Шешуші кезеңде сайысушылар бірі бастаған жырды екіншісі жалғастырып, ойды өрбітіп отырған. Шара барысында Ақтөбеден шыққан ақындардың шығармалары мәнерлеп оқылды. Қатысушылардың көпшілігі Ертай Ашықбаевтың өлеңдерін таңдаған. Жыр жаттағандардың жас ерекшеліктері әртүрлі. 20 мен 70 жас аралығындағы ақындар бар. Әдебиетке қызығушылық танытқан көрермен үшін бұл - ақындардың шығармашылығымен жақынырақ танысып, поэзия әлеміне бойлайтын мүмкіндік болды. Ұйымдастырушыларды "Жұмадағы жыр" өлең оқылатын ғана емес, сөз қадірі мен әдебиеттің маңызын дәріптейтін рухани алаңға айналғандығы қуантып отыр. Байқау қыркүйек айы аяқталғанша, әр жұмада өтеді.Количество показов: 9
Дата создания: 08.09.2026 11:57:56
