Қалада жеке автотұрақ болған аумақ абаттандырылып, жаңа аллеяға айналды
Бұған дейін бұл аумақ жеке көлік тұрағы болған. Тұрақ орнына тұрғындар серуендеп, демалатын жаңа қоғамдық кеңістік пайда болды. «Сәлем» деп аталатын шағын саябақ Бөгенбай батыр көшесінің бойында, 12-шағын ауданда орналасқан. Жалпы аумағы 7 мың 671 шаршы метрді құрайды. Бүгін бұл аумақты көгалдандыру мақсатында 60 түп көшет отырғызылды. Оның ішінде шырша, жөке, қайың, шаған және терек бар. Аллеяда абаттандыру жұмыстары демеушілік қаражат есебінен жүргізілген. Қала әкімінің ұсынымен арнайы компания сыйлық ретінде қала тұрғындарына жайлы орта қалыптастырып отыр. Құрылыс жұмыстары барысында жаяу жүргіншілер жолы төселіп, орындықтар, қоқыс жәшіктері орнатылған. 16 жарық шам қондырылыпты. Сондай-ақ балалар алаңы мен спортпен шұғылдануға арналған воркаут аймағы жасақталған. Суару жүйесі де қарастырылыпты. Жаңа демалыс орны әсіресе осы маңдағы тұрғындар үшін қолайлы болмақ. Енді олар серуендеу, балаларымен уақыт өткізу немесе спортпен айналысу үшін алысқа бармайды. Аллея қала тұрғындарының ортақ игілігіне айналады. Аудан халқы осы шағын саябақтың бой көтеруіне атсалысқан әрбір жанға алғысын айтты. Бұл аумақ "қаланың қақпасы" дейді қала басшысы. Себебі қалаға келген қонақтар әуежайдан түскен мезетте осы жолмен жүреді. Қала бойынша жерлерді мемлекет есебіне қайтару үрдісі жалғасып жатыр. 125 жер қайтарылған. Бұл 90 гектар аумақты қамтиды. Олардың ішінде бас жоспарға сәйкес, игерілмеген жерлер бар. Әкімдік бос жерлерді қаланы көркейту мақсатында қолданып, халыққа қолайлы алаң қалыптастыруға бағыттауда.Количество показов: 7
Дата создания: 05.11.2026 08:52:00
