Исландиядан жеткен ақжолтай хабар ақтөбелік жанкүйерлерді бір серпілтіп тастады. Ақтөбе футбол командасы қарымта матчта "Брейдабликті" ұтты. Бұл-жергілікті футбол клубына Еуропа Лигасының плей-офф ойындарына шығуға мүмкіндік берді. Бүгін түстен кейін халықаралық әуежайда жеңімпаздарды жанкүйерлер құшақ жая қарсы алды. "Брейдабликпен" қарымта матч жанкүйерлерді әбден әбігерге салғаны рас. Отандық телеарналардан тікелей эфирдің болмайтынын естіген жұрттың ұнжырғасы түсті. Соңғы үміттері-ғаламтор. Соның арқасында көз ілместен сайттағы жаңалықтарды қарап, екі көздері төрт болды. "Ақтөбенің" белді ойыншылары қос Сергей Давыдов пен Гридин, Асхат Тағыберген, Дмитрий Мирошниченколардың ойынға қатыспайтынын естіп, қалай болар екен деген уайымға да түстік. Дегенмен, Никитенконың сайыпқырандары жерге қаратпады. Тең ойын көрсеткен қос команданың қайсысы плей-оффқа жолдама алатынын пенальти анықтап берді. Тимур Кападзе мен Эмиль Кенжесариевтер әдемі голдың авторы атанды. Ал, қақпашы Андрей Сидельниковтің кешегі ойынын ерлікке балауға болады. Қарсылас команда ойыншылары соққан бес доптың төртеуін қақпаға дарытпады. Жанкүйерлер Сидельниковтың қырағылығына тәнті болды. Бұрын-соңды "Ақтөбе" Еуропа лигасына іріктеудің үшінші раундынан әрі аса алған жоқ. Сондықтан, кешегі нәтиженің көңілге қуаныш сыйлағаны айтпаса да-түсінікті. Бүгін халықаралық әуежайға келген жанкүйерлер футболшылар мінген ұшақтың қону уақыты екі мәрте кешіктірілгеніне қарамастан, сарыла күтті. Жалауларын асынған қалың топқа тәртіп сақшылары да кедергі болмады. "Ақтөбенің" қарсыласы бүгін Швейцарияда жеребе тарту нәтижесінде белгілі болды. Біздің клуб Еуропа Лигасының плей-офф ойындарында "Динамо Киевпен" кездеседі. Бұл аты дардай команда УЕФА Еуропа елдері Кубогын екі мәрте иеленген. Сонымен қатар, УЕФА-ның Супер Кубогын жеңіп алған. Алғашқы матч 22-тамызда, Қобыланды батыр атындағы Орталық стадионда өтеді. Қарымта ойын 29-нда Украинада.