Биыл қалада жол құрылысы мен жөндеу жұмыстарына қыруар қаржы бөлінді. Төселіп жатқан жаңа асфальтың сапасын бақылау жол активтерінің ұлттық сапа орталығы құзырында. Жылжымалы зертхана жұмысшылары бүгін жөндеу жұмысы жартылай бітіп тұрған Зинченко көшесінен сынама алды.Зинченко көшесінде жаңартылып жатқан асфальт жабындысының қалыңдығы шамамен 13 см болады. Қазір соның 8 см болатын қабаты төселген. Күн ашылып, жер көпкен соң бетіне тағы 5 см асфальт жатады. Жылжымалы зертхана жұмысшылары алған сынаманың қалыңдығы алдымен өлшенді. Мердігерлер айтқандай 8 см. Тіпті одан сәл асады. Пайдаланылған құрылыс материалдарының сапасы зертханада тексеріледі. Қазір қала көшелерін жөндеумен айналысып жатқан компаниялар отандық өнімдерді ғана пайдаланады. Қала жолдарына төселіп жатқан бетон ғана Маңғыстау облысынан. Қалғаны жергілікті кеніштерден. Жылжымалы зертхананың іске кіріскеніне көп бола қоймаған. Бұған дейін Жанқожа батыр көшесінен сынама алған. Нәтижесі жуық арада шығады. Ұзындығы 3200 метр болатын Зинченко көшесінде жоба бойынша асфальт жабындысы жаңартылып, бір жақ қапталына тротуар төселеді. 230 миллион теңге қаржы жұмсалып жатыр. Орташа жөндеу жұмысы болғандықтан мердігер оның сапасына 2 жыл кепілдік береді. Биыл қалада 97 көше жөнделеді. 30-да жұмыстар басталып кеткен. Республикалық бюджеттен бөлінетін қаржы көлемі 14 миллиард теңгеге жуықтайды.