1-қазанда жылуға төленетін ақы көтерілуі мүмкін. "Ақтөбе жылу-электр орталығы" тарифті 74 пайызға өсіру туралы өтініш берді. Құжат қазір табиғи монополияларды реттеу және бәсекелестікті қорғау департаментінде қаралып жатыр. Ведомство мамандары бүгін орталықта болып, мекеме өз міндетіне алған инвестициялық жобалардың орындалу жайын тексерді. Жылу-электр орталығы 2013 жылы қызмет құнын өсірген кезде үш жылда 941 миллион теңгенің инвестициялық бағдарламасын орындауды өзіне міндет етіп алған. Бүгінге дейін 691 миллион теңгенің жұмысы орындалды. Жаз бойы жылу-электр орталығында жеті қазандық, 5 су қазандығы және 5 бу турбинасы жөнделді. 6 агрегат әлі де жөнделіп жатыр. 

Қалған 240 миллион теңгенің жоспарын орындау мүмкін болмай тұр. Өйткені, компанияда қаражат тапшы. Былтыр шілде айында күтпеген жерден газ бағасы қымбаттаған. Биылғы 1-қыркүйекте магистральды құбырлар арқылы таратылатын көгілдір отын құны тағы да өсті. Суды газбен ысытатын мекеме отынға жұмсалатын ақша тарифтың 70 пайызын құраған кезде шұғыл реттеу шарасы ретінде құзырлы органдарға қызмет құнын көтеру туралы өтініш жіберген. Қазір жылудың  1 гига калориясы 1 мың 314 теңге. Өтініште оны 2 мың 200 теңгеге өсіру көзделген.