ҚР Қаржы министрлігі шетелден әкелінетін тауарлар көлеміне шектеу қойды. Қойылған талаптар 2 мамырдан бері жүзеге асырылып келеді. Бұл туралы бүгін облыс бойынша мемлекеттік кірістер департаментінің "Әуежай-Ақтөбе" кеден бекетінің мамандары хабарлады. Демалыс маусымы басталған бойда өзге елге кетіп, артынып-тартынып келетіндер де жоқ емес. Алайда, 2 мамырдан бастап ҚР Қаржы министрлігі шетелден әкелінетін тауарлар көлеміне шектеу қойды. Кеден одағының кедендік шекарасы арқылы өткізілетін тауарлар адам басына 10 мың еуродан артық болмауы тиіс. Шетелден әкелінген тауарлардың саны бір адамға мынадай көрсеткіштен аспауы керек. Киім және киім заттары, төсек-орын керек жарақтары, кілемдер және басқада еденге жаятын тоқымалар, сондай-ақ бас киімдер 2 данадан көп болмауы керек. Ал, аң терісінен, былғарыдан жасалған бұйымдар, бір заттан аспауы қажет. Азық-түлік өнімдері бір адамға 10 келіден артық болмауы керек. Және кедендік шекарадан жеке тұлғаның өтуі және тауар өткізу жиілігі айына бір реттен аспауы тиіс. Сондай-ақ, мемлекетке қарыз тұлғалар да шетелге демалысқа шыға алмайды. Өзге елде демалғыңыз келсе, алдымен қарызыңыздың бар-жоғын тексертіп алыңыз. Шетелден әкелінген тауар салмағы жеке тұлға үшін 50 келіден аспауы шарт. Одан асса салық төлейсіз. Салық көлемі әкелінген тауар сомасының 30 пайызынан аспайды. Бұл кедендік салық бюджет ақшасын толтыру мақсатында қолға алынған шара.