Жеңіс даңғылындағы тұрғындардан маза кетті. Олар бүгін шатырдың жиегі үгітіліп құлап жатқанын айтып редакциямызға хабарласты. Бұл мәселе 12 жылдан бері айтылып келеді.  56 жылдық тарихы бар баспананың шатыры қирап тұр. Дәлірек айтқанда, шатырдың жиегі үгітіліп, жүргіншілер жолына шашылып қалған. Түн ортасындағы шудан шошып оянған тұрғындар тағы да әкімдіктен көмек сұрап шықты. Олар өз күшіне сенбейді. Себебі тұрғындардың 80 пайызы зейнеткер. Бұл үйдің иесі жоқ. Тұрғындардың арасынан шыққан белсенді топ қазір құжаттар жинап, тіркеудің қамымен жүр. Техникалық паспорт, жер актісін алу артта қалды. Ендігі шаруа, үйді есепке қою. Осы екі аралықта қалалық әкімдіктің мамандары келіп, жөндеудің екі нұсқасын ұсынған. Жеңіс даңғылындағы үйдің бір беті облыстық филармонияға қарап тұр. Сары, қоңыр түспен әктелген. Екінші қабырғасы №16-шы мектеп жақта. Бұл жағының сыры мен сыны кеткен. Ешқандай бояу жоқ. Бір үйдің екі қабырғасы екі түрлі. Мұндағы тұрғындардың назы осы. Жұрт көреді деген тұсын көзбояушылықпен әктеген, өзгесін ұмыт қалдырған. Жеңістің 70 жылдығы жақындап келеді. Алайда "бұл мәселенің атаулы датаға еш қатысы жоқ" деп отыр тұрғын үй испекциясының басшысы Жұлдызбек Бисембин. Оның айтуынша, Жеңіс даңғылында мәселесі шешімін таппаған баспана көп және оны шешу әкімдіктің емес, тұрғындардың өз бас ауруы екен.