Бүгін  "Жасөспірім" республикалық жедел алдын алу шарасы басталды. Қалада тәртібі нашар  отбасылар мен  бұзық балалар тексеріліп жатыр. Бүгін Зауыт полиция бөлімінің жасөспірімдер ісі жөніндегі инспекторлары ішімдік ішіп, бала тәрбиесімен айналыспайтын ата-аналардың пәтерлеріне бас сұқты. Зауыт полиция бөлімінің жасөспірімдер ісі жөніндегі инспекторы Жанна Өтеева 5 жастағы Анастасияның анасы Светлана Лымарьды бақылауға алған. Инспектор бүгін Анастасия тәрбиеленіп жатқан пәтерге келіп, отбасының жағдайымен танысты. 36 жастағы Светлана қызымен үйінде болып шықты. Соңғы рет оның үстінен полицияға арыз 4-ші ақпанда түсті. Ақтөбеде туып-өскен Светлана осыдан 12 жыл бұрын тұрмысқа шығып, Украинаға көшкен. Ал 2010-шы жылы қызын алып, Қазақстанға қайтып келеді. Ақтөбеде ол туысының пәтерінде тұрып жатыр. Сатушы болып жұмыс істеген. Айтуынша, өткен айда ғана жұмыстан босап қалған. Жаңа жұмыс орнын қарастырамын деп уәде берді. Бүгінде облыста тәртібі нашар 400 отбасы тіркеуде. Оның 180-і  қалада тұрады. Ал жасөспірімдерді бейімдеу орталығына былтыр 196 бала орналастырылған. Қаңтардан бері  8 бала жеткізілді. "Жасөспірім" жедел алдын алу шарасы ақпанның ортасына дейін жалғасады.