Алдағы дүйсенбіден бастап  баспанаға мұқтаж жас отбасылардың келесі легінен  құжаттар қабылдау басталады. Тұрғын үй "Нұр-Ақтөбе" ауданында салынып жатыр. Жас отбасыларға арналған тұрғын үй бағдарламасы бойынша 216 жанұя 2014 жылдың желтоқсан айына дейін пәтерлі болады. Құжаттар Оңтүстік-Батыс ауданындағы №10 орта мектепте қабылданады. "Нұр-Ақтөбе" ықшам ауданында салынып жатқан 9 қабатты тұрғын үйден бір және екі бөлмелі пәтерлер 8 жыл мерзімге жалға берілмек. Жас отбасыларға қойылар талаптар жетерлік. Ең бастысы ерлі-зайыптылардың екеуінің де жасы өтініш берген сәтте 29 жастан аспауы қажет. Содан соң неке мерзімі 2 жылдан кем болмауы тиіс. Айта кетелік, биылғы жаңадан енгізілген талаптар да бар. Мәселен  толық емес отбасы, яғни ажырасқан соң ата-анасының біреуі балаларды тәрбиелесе құжат тапсыра алады. Бала саны көп отбасылардың  ұпайы да жоғарылап, мүмкіндігі де артады.  Және барлық отбасы мүшелерінің Ақтөбе қаласында тіркелуі міндетті. Бағдарлама бойынша тұрғызылып жатқан үй тек 1 және 2 пәтерлі. Барлық талаптарға сай келіп, жоғары ұпай жинағандардың құжаттары "Тұрғынүйқұрылысжинақбанкінің"  облыстық бөлімшесіне жіберіліп, отбасылардың төлем қабілеттілігі тексеріледі. Айта кетелік, былтыр аталған бағдарлама бойынша мыңнан аса жас отбасыдан өтініш түсіп, 216 жанұя баспаналы болды. Былтыр құжат толтырған жанұялардың тізімі базада сақталғанымен, өтініш қайта толтырылмаса ол жарамсыз деп саналады.