Трансплантация бойынша республикалық үйлестіру орталығының басшысы, жерлесіміз, атақты хирург  Жақсылық Досқалиев Ақтөбеге келді. Ол кеше апалы-сіңлілі екі адамға ота жасады. Сіңлісі созылмалы бүйрек ауруына шалдыққан апасына ағзасын беруге келіскен. Ал бүгін 25 жастағы інісі 34 жастағы ағасын құтқарды. Операция  өңірімізде алғаш рет жасалды. Донордан бүйректі ажырату операциясының өзі 3 сағатқа созылады. Операцияның  барысын  Жақсылық Досқалиевтің өзі түсіндіріп тұрды. Жақсылық Досқалиев жасаған екі операциямен биылғы жоспар орындалды. Ал келер жылы 10 адамға донордан бүйрек алып, салу отасы жасалады. Оны енді өзіміздің хирургтар жасайды. Облыста 219 адам бүйрек тапшылығы дертінен зардап шегіп отыр. Солардың үштен бірі донорлық ағзаға зәру. Көп жағдайда донор болуға келісетіндер науқастардың туған бауырлары мен ата-аналары. Сондай-ақ елімізде 2012-ші жылдан бері аурухана кереуетінде өліп кеткен адамдардың сау ағзаларын пайдалану  әдісі де қолданылып келеді. Ақтөбеде биыл маусым айында жас жігіттен осылайша жүрегі, екі бүйрегі мен бауыры алынып, Алматыға жолданған. 4 адам құтқарылды.