Биыл қаладан  7 шақырым қашықтықта орналасқан Жаңақоныс ауылын дамытуға 2 млрд теңге бөлінді. Қаражат ауылда мектеп, инженерлік желілер, жол салу жұмыстарына жұмсалуда. Бүгін Новый селолық округінің әкімі Бақыткелді Мыңжасаров бұқаралық ақпарат құралдарының өкілдеріне елді-мекендердің  аумағында жүргізіліп жатқан жұмыстарды көрсетті. Новый селолық округінде  бүгінде 9 мың халық тұрады. Соңғы бес жылда тұрғындары артып келе жатқан аумақта  "Бірлік" тұрғын үйлер кешені мен "Бірлік" "А", "В" кенттері пайда болған. Жаңақоныс ауылы аумағында 18 шаруашылық субъектісі жұмыс істейді. Азық-түлік дүкендері, шаштараз, монша, дөңгелек жөндеу орталығы жеткілікті. Бір жиһаз цехы бар. Әйтсе де ауыл проблемасыз емес. Ол -  мектеп мәселесі. 9 мың халқы бар үлкен ауылда қазір бір орта мектеп пен 1 мемлекеттік, бір жеке балабақша жұмыс жасайды. Бұл өте аздық етіп отыр. Дегенмен бұл мәселе келер жылы  шешімін табуы тиіс. Қазір Жаңақоныста 600 орындық мектеп құрылысы жүріп жатыр. Білім ордасының құрылысына 866 млн теңге бөлінген. Мектептің тапсырылу мерзімі 2015 жылдың қазан айы. Қазір Жаңақоныс ауылының "Жастар" ықшам ауданынан "Б" кварталы бағытына қарай Қобда тас жолына  шығатын көлік жолының құрылысы жүріп жатыр. Ұзындығы 863 метр болатын жол 6 метрге кеңейтілуде. Сондай-ақ Ақтөбе-Қобда трассасынан Құрашасай ауылына баратын жол күрделі жөндеуден өтпек. Ол үшін 63 млн теңге бөлінді. Айта кетелік, күз бен қыста ауылдағы ойдым-ойдым жолдан әбден ығыр болатын  жаңақоныстықтар, ауылдағы 60 көшенің кезең-кезеңімен болса да жөнделіп қалғанын қалап отыр.