Қалалық жұмыспен қамту бөлімі сұранысқа ие мамандықтар тізімін жариялады. Нарық заманында өзге кәсіптерге қарағанда ағаш шебері, аспаз, шаштараздар мен жүргізушілер үшін жұмысқа орналасу әлдеқайда жеңілірек. Ал, заңгерлер мен қаржы мамандары үшін ұсынылатын жұмыс орындары шектеулі. Бүгін ашық есік күнін өткізіп, тұрғындарға бос жұмыс орындары мен сұранысқа ие кәсіптер   туралы ақпараттандыруды халыққа қызмет көрсету орталығы  міндетіне алды.  Жұмыссыздардың қатарында 5 баланың әкесі Серік Жармағамбетов те бар. Ол 4 айдан бері жұмыс іздеп, табанынан таусылған. Ағаш шебері өз жұмысын жетік білетіндігін айтады. Алайда,  қызметі  үшін төленетін жалақы мөлшері көңілінен шықпай жүр. Халыққа қызмет көрсету орталығына анықтама алуға келген ол, бүгін 50 мың теңге еңбекақысы бар  жұмысқа жолдама алды.Жұмыс берушілердің талаптары әртүрлі.  Мәселен, кей мекемелер жұмысшының жасына шектеу қоймаған. Бірақ белгілі сала бойынша жұмыс тәжірибесінің болуы міндетті.  Қалада «Жұмыспен қамту- 2020» бағдарламасы жүзеге асырыла бастағалы  5 883 адам жұмыспен қамтылған. Келер жылы бағдарламаға 1972 адамды қатыстыру жоспарда.