Ақтөбе облысының іздестіру қозғалысына биыл - 25 жыл. Осы уақыттың ішінде ақтөбелік іздеу жасақтары 35 рет экспедицияға шығып, мыңнан аса сарбаздың сүйегін тапты, қайта жерледі. Атаулы датаға орай бүгін "Достық үйінде" мерекелік жиын өтті. Іздестіру қозғалысының жұмысына септігін тигізген тұлғалар марапатталды. Ақтөбедегі алғашқы іздестіру жасағы 1988 жылы хромтаулық тұрғын Ақзада Хайруллинаның бастамасымен құрылған. Ол соғыста жоғалған атасы Хайролла Боқаевты іздеп таппақ болған. Сөйтіп, Ақзада Қазан мемлекеттік университетінің студенттерімен келісіп, Ресейдің Новгород облысына тұңғыш экспедиция ұйымдастырады. Ақзада Хайруллина атасын тапқан жоқ. Бірақ, Ақтөбенің тарихында аты қалды. Нәзік жанды басшы жасақты он жыл басқарды. Қазір ҚР Ұлттық мұрағаты қолдану қызметінің жетекшілігінде жүр. 1990 жылдары біздің облыста қосымша "Аққу", "Гермес" және "Әлия" іздестіру топтары пайда болып, олар Ресейдің Калуга, Смоленск, Новгород облыстарында қазба жұмыстарын жүргізді. Тәуелсіздік алған кезеңде мұндай жорықтар тоқтап, тек 2009 жылы қайта жанданды. Сол жылы Ақтөбедегі бірнеше іздестіру тобы "Жауынгерлік бауырластық" бірлестігіне қосылып, бір үлкен жасақ құрды. Оған қазір Гумер Галеев жетекшілік етеді. Іздеушілер соңғы кезде жорықтарға студенттер мен оқушыларды ілестіріп жүр. Мәселен, Мұғалжар ауданы, Ақкемер ауылдық мектебінің оқушысы Нұрлан Балғалиев осы жылы сәуір-мамыр айларында Новгород облысындағы экспедицияға қатысып қайтты. Жалпы, 25 жылдың ішінде ақтөбелік іздеу жасақтары 35 рет экспедицияға шығып, мыңнан аса сарбаздың сүйегін тауып, қайта жерледі. 60 шақты сарбаздың табылған медальоны арқылы аты-жөні белгілі болды. Ұмыт қалған, хабарсыз кеткен ақтөбелік жауынгерлердің есімдерін қайта жаңғыртқан іздестіру қозғалысының мүшелеріне бүгін облыс әкімінің атынан алғыс айтылды. Жорықтарды ұйымдастыруға қаржылай қолдау көрсеткен демеушілер де алғыс хаттармен құрметтелді.