41 жастағы Мұғалжар ауданының тумасы Әміржан Исмаилов іске осыдан 3 жыл бұрын кіріскен. 2011-2012-ші жылдар аралығында ол бірнеше мәрте аса ірі көлемде шикі мұнайды алып, сатып, сақтаумен айналысқан. Оның қолында қара алтынның шығу заңдылығын растайтын ешбірі құжаты болмай шықты. Ал  ірі кәсіпорындармен сауда жүргізу  мақсатында әділет департаментінде өз атына  "Компания Сириус" ЖШС серіктестігін тіркетеді. Компанияның мөрі мен құжаттары қолына тиісімен қаладағы екінші деңгейлі банктерде есепшот аштырады. Сол есепшоттардан 2011-ші жылдың тамызы мен қазан айлары аралығында 32 миллион 915 мың теңгені қолма қол ақшаға айырбастап алған.  Жасалған қылмыстан мемлекетке келтірілген шығын көлемі 73 миллион теңгені құрады. Әміржан Исмаилов биыл мамыр айында ұсталған. Ендігі 5 жылын темір тордың арғы жағында өткізеді. Жұмыссыз, бойдақ  ер адам  саяжай учаскелерінің бірінде тұратын болып шықты. Заңсыз мұнай саудасынан түскен қомақты қаражаттың қайда жаратылғандығы белгісіз.