Заң білмейтін басшылар жауап берді
Мемлекеттік қызметкерлер "Мемлекеттік сатып алу туралы" Заңды білмейді. Бүгін олар Тәртіптік кеңеске келіп, заңды білмейтінін ашық мойындады. Бұл жолы "Мәртөк аудандық ветеринария станциясы" мемлекеттік коммуналдық кәсіпорынының басшысы Рим Әбішев сүрінді. Ол қазынадағы қаржыны келісім шартқа қол қоймай жұмысты атқаруы тиіс мекемеге аударып жіберген. Бар құжатқа қол қойып, мөр басып отырған оның есепшісі болып шықты. Мемлекеттік қызметкер бар қателігін білместік деп заңды белден басқанын мойындады. Осы үшін де Тәртіптік кеңес мүшелері қызметкерді жұмыстан босату қажет деп шешім шығарды. Бұл ұйғарым аудандық әкімдікке жолданды. Сонымен қатар бүгін осы Мәртөк ауданының дене шынықтыру және спорт бөлімінің басшысы Нұрпейіс Бекқалиевке қатысты іс қаралды. Ол аудандық балалар және жасөспірімдер спорт мектебінің директоры қызметіне Қазанбаевты тағайындаған. Бар уәжі ол депутат, аты ауданға мәлім адам, жақсы маман. Бірақ, заң бойынша мемлекеттік бос орындарға конкурс өткізілуі шарт. Бұл саланы қадағалайтын аудан әкімінің орынбасары Бұлбұл Күзембаева қол астындағы басшыны ақтап алуға тырысқанымен, бар іске өзі жауап беретінін аңғартты. Айта кетейік, тексерулер кезінде ешқандай байқауға қатыспай, жұмысқа қажетті құжаттарды, әсіресе денсаулығына байланысты анықтаманы тапсырмай қызметке кіріскен Қазанбаевпен арадағы келісім шарт бұзылған. Осыдан соң Тәртіптік кеңес аудандық дене шынықтыру және спорт бөілімінің басшысы Нұрпейіс Бекқалиевті "қызметіне сай емес" деп шешім шығарды. Мұның бәрі аудан әкіміне жолданады. Соңғы нүктені де аудан басшысы қояды. Еске салсақ, бұған дейін Тәртіптік кеңестің барлық ұйғарымы мүлтіксіз орындалды.
Количество показов: 1987
Дата создания: 15.04.2015 18:38:08
