Бүгін Ырғыз ауданының әкімі Мирхан Дуанбеков өткен жылды қорытындылап, есеп берді. Былтыр Ырғыз-Торғай мемлекеттік табиғи резерватында 8000-нан астам киік қырылып қалды. Көбі аналық ақбөкендер мен құралайлар. Жаппай қырылуға пастереллез індеті себеп деген қорытынды жасалды. Бұл ауру қыстан әрең шығып, төлдеу маусымы басталғанда ағзасы әдбен әлсіреген жануарда болады. Мирхан Дуанбековтың айтуынша, ерекше қорғалатын аумақ қазір аса бақылауға алынған. Былтырғы жағдай қайталанбауы тиіс. Қазір резерватта 10 мыңнан астам киік бар. Ырғыз ауданында 15 240 адам тұрып жатыр. Ауыл тұрғындарының негізгі кәсібі-мал шаруашылығы. Көктемде жүн-тері қабылдау пункті ашылмақ. Былтыр өткізілген ауыл шаруашылығы жәрмеңкелерінде 9,5 млн.теңгенің өнімі сатылған. Ауданда 22 мектеп пен 28 балабақша бар. Ұлттық біріңғай тестілеу көрсеткіші де жаман емес. Орташа 81,4 балл. Алайда, әлі күнге дейін пешпен жылытатын, қамыс пен саманнан тұрғызылған мектептер бар. Олар Жаныс би мен Шеңбер тал селолық округтерінде. "Батыс Еуропа-Батыс Қытай" тас жолы салынғалы аудан әлеуметтік-экономикалық жағынан өркендеп келе жатыр. Ауданда 2 газбен қамту орталығы бар. Әуежай алаңы да салынған. Алайда, ол іске қосылған жоқ. Ақтөбе-Ырғыз арасындағы ұшақ қатынасы туризм саласы дамыған жағдайда ғана жанданбақ. Ұзындығы 165 шақырымды құрайтын "Шетырғыз-Ырғыз" газ құбырының құрылысы биыл аяқталуы тиіс. Ақши, Жаныс би, Құрылыс ауылдарына газ тарту мәселесі қаралып жатыр.