Әуежай мен теміржол вокзалында қауіпсіздік күшейтілді
Әлемде лаңкестік оқиғалардың жиілеуіне байланысты Қазақстанда да қауіпсіздік шаралары күшейтілді. Ақтөбеде стратегиялық маңызға ие нысандар қауіпсіздікті ең жоғары деңгейге жеткізді. Ақтөбе халықаралық әуежайы мен темір жол вокзалында күзет қызметі күшейтілген тәртіпте жұмыс атқаруға көшті. Келер жылы Ақтөбе темір жол вокзалы қоршауға алынып, алдыңғы тұсынан да, перрон жағынан да бақылау-өткізу бекеті тұрғызылады. "Вокзал-Сервис" АҚ вокзал маңындағы алаңдарды өз иелігіне алу үшін облыс әкіміне хат жолдаған. Жер бөлінген уақытта бақылау-өткізу бекетінің құрылысы басталады. Қазір вокзалдың кіре берісінде металл детекторлар жұмыс жасап тұр. Ақтөбе темір жол вокзалымен тәулігіне 22-23 пойыз өтеді. Күніне 3 мыңға жуық адам пойызға отырады. Жолаушылардан бөлек шығарып салушылар да бар. Металл детектормен 1 күнде 5 мыңнан астам адам тексеріледі. Әуежайдың кіреберісінде де металл детектор тұр. Күзетшілер металл іздегішпен қаруланған. Ұшаққа отырар алдында әр жолаушы жүктерімен қоса тыңғылықты тексеріледі. Алдымен құжат қаралады. Авиациялық қауіпсіздік қызметінің басшысы Сергей Елизаровтің сөзінше, бұған дейін түр-әлпеті, іс-қимылы күдік туғызған адам арнайы бөлмеде жеке тексерілетін. Бұл он шақты адам ғана болатын. Ал қазір өткен 100 адамның 20-сы жеке тексеруден өтеді. Ол үшін арнайы бөлме жабдықталған. Жолаушы аяқ киімінен бастап, үстіндегі киімдерді шешеді. Тексеруші қолымен тінтіп шығады. Қазақстанда Ақтөбе мен Астана халықаралық әуежайлары қауіпсіздікті қамтамасыз ету жағынан Алматыдан кейін екінші орында.
Количество показов: 2055
Дата создания: 19.11.2015 19:04:40
