Бүгін бір топ такси жүргізушілері наразылыққа шықты. Олар бірнеше жылдан бері шешімін таппай жүрген мәселелерін қайта көтерді. "Сапар" автобекеті маңында кешелі бері жеке көліктерге тұруға тыйым салынған. Темір тұлпарын күнкөріс көзіне айналдырған такси жүргізушілері бұл шешіммен келіспей отыр. Дәл осы жерде шамамен 6 жылдан бері Хромтауға жолаушы тасып, нәпақасын тауып жүрген Ерлан Сағымов автобекеттің маңынан такси жүргізушілеріне  20 метр жердің бұйырмады деп ашулы. Айтуынша, құзырлы органдар негізсіз белгіні іліп қойып оларға жұмыс жасауға мүмкіндік бермей отыр. "Сапар" автобекеті мен "Гелиос" жанар-жағар май бекетінің арасында көліктерге тұруға тыйым салынған белгі бұрыннан бар. Жығылғанға жұдырық дегендей, кеше бұл маңда тұруға тыйым салатын белгіге қосымша белгі тағы  ілініпті. Жеке такси жүргізушілерінің үстінен жергілікті әкімдікке арыз түсіргендер де анықталды. Ол - "Гелиос" ЖШС-гі. Ондағылар такси иелерінің талабы негізсіз деген уәж айтады. Тіпті такси жүргізушілерін тазалық сақтамайды деп айыптады. Оқиға орнына ертемен келіп, заңды бұзған көлік иелеріне ескерту жасаған тәртіп сақшылары болса  бұның бәрін өздерінің күнделікті жұмысы деп атады. Сондықтан талапты орындамаған жүргізушілерге жұмсақтық танытпады. Құжаттарынан олқылық анықталғандарға  5 айлық есептік көрсеткіш көлемінде айыппұл салды. Жүргізушілер қанша даурыққанымен бұл іс жанар май бекетінің пайдасына шешілген. Жергілікті әкімдіктің  тиісті шешімі бар. Онда автобекет пен "Гелиос" аралығында  жеке таксилердің тұруына тыйым салынған. Сондай-ақ құжатта жанар-жағар май бекетінде бензин бөшкелерінің  сақталуына байланысты темекі шегуге де қатаң тыйым салыныпты. Алайда такси жүргізушілерінің бұған біржолата көндіккісі жоқ. Себебі кәсібін заңдастырып, салығын төлеп отырғандар бар. Кейбіреуі Хромтау мен Бадамшаға жиырма жылдан бері жолаушы тасиды. Енді бұл таксилерге қай жерден орын бұйырмақ? Ал үйренісіп қалған жолаушылар қайда баруы тиіс? Бұл жағы беймәлім.