Әуе қалашығында тұратын зейнеткерлер тыныштықты, ал жасөспірімдер үйінің тәрбиеленушілері спорт алаңы болғанын қалайды. Арнамызға хабарласқан тұрғындар "ағашты заңсыз кесіп жатыр" деп дабыл қақты. Мәселені түсіндіріп, араша сұраған топқа жасөспірімдер үйінің басшысы келді. Бірақ, екі тарап бір-бірін тыңдаудан бас тартты. Тіпті, ашынған зейнеткер мен жасөспірімдер үйінің басшысы Жанна Дүйсенбина жаға жыртысып қалды. Жасөспірімдер үйінде 68 тәрбиеленуші бар. Таяу уақытта тағы 20 бала келіп қоныстанады. Олардың бос уақытын тиімді өткізу  мекеме басшысы үшін ұзақ жылдар бойы шешімін таппаған мәселеге айналған. Содан бірнеше қайырымдылық қорынан қаржы сұрап, көмек күтті. Алматылық қордан жауап келіп, мекеме басшысы қалалық тұрғын үй-коммуналдық шаруашылық, жолаушылары тасымалы және автомобиль жолдары бөлімінен рұқсат алған. Олар 25 талды кесуге келісім берді. Бұл аумағы 1 200 шаршы метр болатын жер. Қазір 21 ағаш кесіліп, оны арнайы көлікпен жұмысшылар тасып жатыр. Тұрғындар  енді прокурорлардан көмек сұрауға бекінген. Айта кетейік, Жасөспірімдер үйінен 100 метр қашықтықта шағын футбол алаңы бар. Бұрын жаңа болса, қазір қоршаулары бұзылып, күтімсіз қалған. Әуе қалашығын мекендегендер осы орынды жайлы спорт алаңы етіп қайта жасақтаса, ағашты кеспей, мәселені шешуге болатынын айтады.