1 қаңтардан бастап коммуналдық қызмет түрлерінің тарифі өседі. "Ақбұлақ", "Трансэнерго" АҚ-дары және "Энергосистема" ЖШС-нің қазіргі тарифтерінің қолданыс мерзімі жыл соңында аяқталады. Одан кейін олар 2016-2020 жылдарға бекітілген ұзақ мерзімді тарифтер негізінде жұмыстарын бастайды. 1 қаңтардан бастап "Трансэнерго" АҚ-ы коммуналдық қызмет құнының орташа бағамын 33 пайызға арттырады. Ал, тұрғындар үшін тариф 25 пайызға өседі. Бұрын 1 гигакалория үшін - 2 129 теңге төлеп келген тұтынушылар 2016 жылдан бастап 2 653 теңге төлейтін болады. "Энергосистема" ЖШС-і өзге шығындары үшін жарық бағасын 4 пайызға арттырды. Алайда оның тұрғындарға еш қатысы жоқ. Керісінше, облыс халқы үшін 1 қаңтардан бастап жарық құны 0,86 пайызға төмендейді. Су, жылу және жарық беруші мекемелер Табиғи монополияларды реттеу және бәсекелестікті қорғау комитетінің Ақтөбе облысы бойынша департаментіне тарифтердің орташа бағамын бұрынғыдай бірден бірнеше жылға есептеуді ұсынған. Алайда, ол қанағаттандырылмай, әр тариф орташа әр жылы қойылатын болып бекітілді. Ал, 2016-2020 жылдар аралығында аталған үш мекеме жалпы құны 24 млрд. 5 млн. теңге болатын инвестициялық бағдарламаны жүзеге асыруды жоспарлап отыр. Инвестициялық бағдарлама тозығы жеткен құрылғыларды азайтып, өндірістік шығындар мен технологиялық ысыраптарды шектеуге мүмкіндік береді.