Су ерте тасуы мүмкін
Қалалық төтенше жағдайлар басқармасының мамандары су тасқынының алдын алу шараларын бастап кетті. Биыл көктем ерте келеді. Қатты аяз болмайды. Төтенше жағдайдың алдын алу мақсатында қазір қала көшелері мен ауылдық жерлерді қардан тазарту жұмыстары жүріп жатыр. Дегенмен, мамандар қала ішіне қарағанда ауылдарды су басу қаупі жоғары екендігін айтады. Ақтөбеліктерге аулаларындағы қарды шығаруды кейінге шегермей, осы бастан сыртқа тасу керек екенін ескертеді. Мамандар соңғы рет 1988 жылы осындай ауа райы болды деп отыр. Құтқарушылар қазір тұрғындарды су тасу қаупі төнген кезде жасалатын іс-әрекеттермен таныстырып жүр. Оған қоса, азаматтық қорғау органдары мен қалалық әкімдік өкілдері су тасқынына қарсы бірқатар шараларды бастаған. Гидротехникалық ғимараттардың жағдайлары мен жағалаулар бақылауға алынған. Егер қызыл су жақындап, қауіпсіз жерге көшуге дайындық басталғанда кез-келген тұрғын өзімен бірге қажетті құжаттары мен киім-кешек, дәрі-дәрмектерін дайындап қоюы қажет. Бірнеше күнге жететін азық-түлікті де ұмытпағаны абзал.
Количество показов: 2065
Дата создания: 24.02.2016 18:15:52
