Мүмкіндігі шектеулі жандар да отбасын құрып, шаңырақ көтере алады. Балалы болып, ата-ана атануға құқығы бар. Бүгін өмірдің қиындығына мойымаған жандар студент жастармен кездесті. Гүлдәрі Қолқанатова туа бітті дертке шалдығып, екі аяғымен жүре алмай қалған. Бірінші топтағы  мүгедек  1979 жылы Баймырза Қолқанатовты кездестіреді. Бір жыл бойы сырласқан екі жас үйленуге шешім қабылдап, ата-ананың рұқсатын алады. Отбасы құрған соң Қолқанатовтар Қызылордадан Байқоңырға қоныс аударған. Ал 2008 жылдан бері Ақтөбе қаласында тұрып жатыр. Туыстарының үйін паналап отырған отбасы өмірдің қиындықтарын бірге жеңіп келеді. Гүлдәрі апа бұған дейін көрпе, киім тіккен. Қазір бар үйренгенін келіндеріне үйретіп жүр. Ал Отағасы Баймырза Қолқанатов бұрын механизатор болған. Біраз жылдан бері қызметте жоқ. Бірақ, жұбайы Гүлдәріге көмектесіп, қиын кездерде жанынан табылады. Төрехан, Төрежан, Ардақ есімді ұлдардың ата-анасы бүгін жастармен кездесті. Оларға өмір жолын айтып, қиындыққа қарсы тұрудың, жақсы күндерден үміт үзбеудің жолдарын түсіндірді. Әрі мүмкіндігі шектеулі жандардың да отбасын құрып, бақытты болуға лайық екенін алға тартты. Кездесуге студенттер мен еріктілер, мүмкіндігі шектеулі жандар шақырылды. Айта кетейік, қазір қалалық сал ауруына шалдыққан азаматтарды қорғау қоғамында 1200-ден астам жан тіркеуде тұр.