Мына адамдар бір түнде далада қалды. Қаңтардың 6-сынан 7-сіне қараған түні Шернияз көшесі №80-ші мекен жайда орналасқан 4 пәтерлі барақ үйде өрт шықты. Тұрғындар тарс еткен дыбыс пен алаулап жатқан оттан шошып оянып, түгел сыртқа шықты. Қолдарына тек құжаттарын ұстап үлгерді. Киім-кешек пен төсек орынның бәрі осы жерде. Әр жерде балалардың шашылған ойыншықтары мен сабақ оқуға арналған үстел өрт сөндірушілер шашқан судан мұз болып, қатып жатыр. Бір-біріне жалғасқан 4 пәтердің біреуі ғана бос болған. Оны иесі ара-тұра жалға беріп тұрыпты. Жалын төртінші пәтерге тарамаған. Ал өзге екі пәтер қазіргі иелеріне ата-әжелерінен мұраға қалған. 1907 жылы салынған үйді әкімдік өткен жылы ғана авариялық баспана деп таныды. Тұрғындарын кезекке қойды. Өрттен зардап шеккен отбасының бірі үй кезегіне 54-ші, енді бірі 55-ші болып тіркелген. Екі көршінің бірі ошаққа от жағады. Ал бірі пәтеріне газ кіргізіп алған. Өрттің шығуына не себеп болғаны әзірге белгісіз. Түнгі үште тұтанған жалынды алты өрт сөндіру көлігімен жеткен төтенше жағдайлықтар 5 сағат бойы сөндірген. Саман кірпіштен тұрғызылған ескі үйді сақтап қалу мүмкін болмады. Қаңтардың қытымыр аязында баспанасыз қалған екі отбасы қазір күлі қалған пәтерін жағалап жүр. Жарық кезде оттан аман қалған ұсақ-түйек заттарын теріп, көңіл жұбатады. Ал кешкілік қайта туыстарының үйіне оралады. Бірақ олар жақының үйінде ұзақ тұра алмайтындарын, әкімдіктен көмек күтетіндерін жеткізді.