Сазды су қоймасының етегі фестиваль өткізу үшін арнайы жасақталған. Жағажайға құм төселіп, орман алқабы ішінен шатырлы қалашық пайда болыпты. Елдің түкпір-түкпірінен және көрші мемлекеттерден келген әр ұжым өз шатырлы ауылына ат қойған. "Дала аккорды-2014" халықаралық авторлық әндер фестивалі Ақтөбеде осымен үшінші жыл қатарынан өткізіліп тұр. Қаладағы "Рюкзак" бард клубының бұған тікелей қатысы бар. Клубтың көркемдік жетекшісі Ольга Акчурина, жыл санап шараның әлеуеті асқақтап келе жатқандығын алға тартты. Биыл қатысушылар да көп. Фестивальға қазылық етушілер арнайы Мәскеуден шақыртылған. Олар автор, композитор, ақын,  ансамбль, орындаушылар арасынан үздіктерін анықтауы қажет. Сондай-ақ балалар байқауының да жеңімпазы анықталып, марапатталады. Орындаушылар фестивальде салмақты, мазмұнды туындылармен қатар әзіл әндерді де орындап, көрерменнің көңілін көтерді. Шатырлы қалашықта үлкен сахна қойылған. Әр жерден гитараның үні естіледі. Орындаушылар сахнаға шығар алдында аспаптарының ішектерін тексеріп, шумақтарын пысықтап алып жатыр. Фестиваль өтіп жатқан алаң аз күнге болса да ақтөбеліктер және қала қонақтары үшін демалыс орнына айналды. Балалар жағажайда алаңсыз асыр салып жүр. Шеберлер ауылы да осында. Қолөнер шеберлері көрме ұйымдастырып жатыр. Ұнаған бұйымдарды сатып алуға болады. Суретшілер де әп сәтте бейнеңді ақ қағаз бетіне түсіріп береді. Ал шәйханада қазақы қонақжайлылықтың үлгісі-кең дастархан жайылған.