Аурудың таралуына жол бермеу үшін науқасты толық оқшаулау керек. Эбола індетін жұқтырды деген күдікпен бүгін бір адам  "Сапар" автовокзалында тексеруге алынды. Қара құрлықты жайлаған дертті жұқтырды деген жолаушы оқшауланды. Мамандар  тез арада дене қызуын анықтауға кірісті. Оқиға орнына шұғыл түрде вирусқа қарсы арнайы киім киген мамандар тобы келіп жетті. Сақадай сай дәрігерлер науқасқа тиісті көмек көрсетпек. Эбола жұқтыруы мүмкін күдікті туралы ақпаратты рейстік автобус жүргізушісі хабарлаған. Дереу жеткен жедел топ, көлікті залалсыздандырды. Эбола безгегіне шалдыққан азамат Гвинеядан Орынборға ұшып келген. Кейін Орынбор-Ақтөбе автобусымен Ақтөбеге жолға шығыпты. Күдіктінің  дене қызуы көтеріліп, лоқсыған. Бұл  аурудың алғашқы белгілері. Оқу-жаттығу қимылдары - Біріккен Ұлттар Ұйымы ұсынған Эбола қызбасының алдын алу шараларына сәйкес өтіп жатыр. Эбола дерті - сирек кездессе де өте қауіпті. 90 пайызы өліммен аяқталады. Эбола вирусы қанмен немесе басқа да сұйықтықтармен тікелей жанасу кезінде жұғады. Мамандар індет өршіп тұрған қолайсыз елдерге бармауды ұсынады. Эболадан төрт мыңдай адам көз жұмды. Батыс Африкада белең алып, Еуропа мен Америкаға дейін жеткен бұл ауруға қарсы әзір дәрі ойлап табылған жоқ. Тек бірқатар елдер шығарған вакциналар сынақтан өтіп жатыр.