Басы ауырып, балтыры сыздап, дәрігердің алдына барған науқас өз құқығын жетік білмейді. 7 жыл бойы денсаулық саласын зерттеп, халықпен жұмыс жасап жүрген "Аман-саулық" қоғамдық қоры осындай тұжырымға  келді. Ақ халаттыларға жүгінетіндердің көбі егде жастағы адамдар болса, төрттен бір бөлігі мүгедектер. Бүгін өңірдегі қариялар мен қоғамдық бірлестік өкілдерін жинаған басқосуда науқастың құқығы мен мемлекеттік тегін қызмет көрсетудің мүмкіндіктері айтылды. Ата заңда халыққа тегін медициналық көмек көрсету кепілдігі анық жазылғанымен, тегін дәрі алып, квотамен емделу қиынның қиыны. Қарапайым ғана емханаға барып, сау адамның басы айналып шығатыны тағы бар. Оған себеп, ұзын-сонар кезек, дәрігер мен науқастың арасындағы қарым-қатынас. Сонымен, біздің құқымыз емхана есігін аттаған сәттен бастап бұзылып жатады. Міне, осы олқылықтар бүгінгі жиынның басты тақырыбы. Негізінен тегін дәрігер мен квота жайы кез келген ауруханада жазулы тұруы қажет. Сонымен қатар бұл ақпарат арнайы сайттардан табылады. "Сіздің денсаулыққа деген құқығыңыз" халықтық анықтамалығында тегін дәрі-дәрмек тізімі, квота алу жолы, бюджет есебінен шет ел ауруханаларында емделу жайы жазылған. Сондай-ақ медициналық қызметкер мен оның жұмысының сапасы туралы арыз-шағым түсіру тетіктері көрсетілген. Шағын анықтамалық әлеуметтік топқа тегін таратылды.