Бүгін өңірімізге жұмыс сапарымен  президент Нұрсұлтан Назарбаев келді. Мемлекет басшысы бірінші болып «Қазхром» транс-ұлттық компаниясы» АҚ-ның жаңа ферроқорытпа зауытын іске қосты. Құны 843 млн. доллар болатын зауыт Ақтөбедегі республикалық индустриаландыру картасына енгізілген ең ірі инвестициялық жоба. Бұл жаңа зауыттың қазығын президенттің өзі қаққан болатын. Бүгін өндіріс ошағының бірінші балқыту пешін өзі іске қосты. Зауыт құрылысы 2010 жылы басталды. Республиканың  индустриаландыру картасына енген ең ірі инвестициялық жобаны жүзеге асыру барысына 28 қазақстандық мердігер кәсіпорын атсалысты. Зауыт салуға шет елдік  бірлескен компаниялар да қатысты. Жаңа өндіріс орны жылына 440 мың тонна жоғары көміртекті феррохром шығаратын тұрақты тоқпен жұмыс істейтін төрт пештен тұрады. Зауыт 11 негізгі өндірістік нысанның басын қосады. Бұл шикі материалды енгізуден бастап дайын өнімді тиеуге дейінгі өндірістік жүйені іске асыратын кешен. Бүгін іске қосылған  пеш жылытуға қойылды. Шілдеде алғашқы металл алынады деп жоспарлануда. Қалған үш пешті іске қосу жұмыстары жүріп жатыр. Қазхром «ТҰК» АҚ-ның президенті Виктор Тильдің айтуынша жаңа технология балқытушы мамандығының қара жұмысшы ретіндегі бейнесін түбегейлі өзгертеді. Енді бұл жұмысшылар заманауи технологиялық білімге ие мамандар. Пештер болса пультпен басқарылады. Арнайы киімдер жеңілдеп, қол еңбегі де азайды. ERG Директорлар кеңесінің төрағасы Александр Машкевич екі жарым мыңнан астам жаңа жұмыс орнының ашылғанын атап өтті. Жоба құны 843 млн доллар. Барлық өндіріс барысы автоматтандырылған. Жаңа зауыт ағынды суларды тазартудың үш кезеңдік жүйесімен қамтылған. Тазартау деңгейі жоғары екі түрлі қазіргі заманғы газ тазарту қондырғылары орнатылған. Бұл қоршаған ортаны мейлінше аз ластап, қатты қалдықтардың санын кемітеді. Зауытты пайдалануға беру нәтижесінде еліміздің жоғары көміртекті феррохромды экспорттау әлеуеті 16 пайызға, ал облыстың экспорттық мүмкіндігі 46 пайызға өседі.