Бүгін президент Нұрсұлтан Назарбаев Қазақстанның "Нұрлы жол" жаңа экономикалық саясатын жариялады. Бұл мемлекет басшысының 2015 жылға арналған халыққа жолдауы. Президент жолдауды ерте жариялауына әлемдік жағдайлардың себеп болғанын атап өтті. Президент Нұрсұлтан Назарбаев Қазақстан мен әлемге жаһандық сынақтар таяп келе жатқанын айтты. Алдағы үш жылда елдің экономикалық өсімін қолдау үшін Ұлттық қордан жыл сайын 3 миллиард доллар бөлінеді. Мемлекет басшысы үкіметке бір апта ішінде тиісті шешімді дайындауға тапсырма берді. Нұрсұлтан Назарбаев ұлттық қордан бөлінетін әрбір тиынның тиімді жұмсалуын қатаң бақылауды үкімет пен «Нұр Отан» партиясына тапсырды. Ол дағдарыс жағдайында үкімет пен әкімдерді білек сыбана іске кірісуге шақырды. Елбасы қарапайым халықты да тынбай еңбек етуге шақырды. Жақын болашақта елдің 200 мыңнан астам тұрғыны жол құрылысына тартылатын болады. Нұрсұлтан Назарбаев үш жыл ішінде балабақшалардағы орын тапшылығын жоюға 20 млрд теңге бөлуді тапсырды. Ал құлаудың алдында тұрған  мектептер мен үш ауысымда оқыту  проблемасын шешу үшін қосымша 70 млрд теңге  бағытталатын болды. Президент ғылымның экономика салаларымен байланысын қамтамасыз ететін 10 жоғары оқу орны анықталғанын айтты. Бұл жоғары оқу орындары ғылыми орталыққа айналады және   профильді мамандар дайындайтын болады. Осы мақсаттарға 2017 жылға дейін 10 миллиард теңгеге дейін қаржы бөлуді тапсырамын", - деді ол. Нұрсұлтан Назарбаев атышулы жемқорлық істерін еске сала отырып, шенеуніктерге қорытынды шығару керектігін мәлімдеді. "Мемлекеттік қызметкерлердің жалақысы, жағдайы көтерілді, содан нәтиже шығару керек. Біз жемқорлыққа қарсы күресті күшейтеміз", - деп ескертті президент.