Педофилдің құрбаны болған 5 жасар қыздың жүйке жүйесіне қатты зақым келген. Бір айдан бері ол облыстық балалар ауруханасында ем қабылдап жатыр. Оған қорғаушысы Раушан Ізтлеуова Дильназ деп лақап ат қойыпты. Раушан Ізтлеуованың айтуынша, ем қабылдағаннан бері қыз баланың беті бері қараған. Ойыншықтарымен ойнап, бар жамандықты ұмыта бастапты. Балалар психологиясы саласында бұрын қызмет еткен Раушанды кеше өткізілген сот-психологиялық сараптамасында қойылған сауалдар қатты таңқалдырған. Қойылған дөрекі сұрақтардан кейін Дильназ қайтадан тұйықталып кеткен. Айуандықтың құрбанына айналған қыз бала қазір мектеп психологінің бақылауында. "Оқу орынын кеше ғана бітірген, тәжірибесі  жоқ маманды  кәсіби психологке ауыстырса",- дейді қорғаушы Ізтлеуова. Осы тілек-талабымен ол бүгін облыстық білім басқармасына келді. Дильназдың денсаулығының дұрысталуына түрлі сот сараптамалары кедергі болып отыр. Дәрігерлердің айтуынша, оған тыныштық керек. Қаламыздағы еріктілер қоғамы отбасына тегін қорғаушы тауып беріп, есепшот та ашқан. Қазір ондағы бар қаражат сегіз мың теңге ғана. Алайда, қайырымды жандар қол ұшын береміз десе, Дильназдың отбасы көмектен бас тартпайды. 5 жасар қыздың мүддесін тегін қорғап жүрген Раушан Ізтілеуова оның анасын "алаяқ" деп атаудан аулақ болуымызды сұрады. Естеріңізге сала кетейік, қыркүйектің 13 күні 35 жастағы педофил 5 жасар қызды зорлаған болатын. Күдікті қазір тергеу изоляторында жатыр.