Ақтөбелік футбол жанкүйерлері кеше ашық кездесуге барды. Көкейде жүрген көп сұрақты жанкүйерлер қойып, сауалдарға Қазақстан футбол федерациясының президені Ерлан Қожағапанов жауап берді. Ашуға булығып, қатты-қатты айтқандардың да сөзін ешкім бөлген жоқ. Жанкүйерлер көкейдегі ұсыныстары мен реніштерін ашық білдірді. Ақтөбелік жанкүйерлерді стадион, ондағы жасыл алаң алаңдатады. Осы жылы "Ақтөбе" футбол клубы 16 ойын өткізсе, соның 5-бесеуі ғана орталық стадионда болған. Ал өзгесі жасанды жабындысы бар қосалқы стадионда өтті. Әр ойынға 9 мың жанкүйер келді деп есептегенде, 6 мың адам футбол көре алмады. Кездесуге келген жанкүйерлердің біреуі атқарушы билік өкілінен "уәде еткен стадион қайда, оның сызбасы бар ма" деп төтесінен сұрады. Жанкүйерлердің тілегі әртүрлі. Бірақ, бәрі де футбол үшін шыр-пыр. Мәселен жергілікті ғана емес, ел футболы үшін де жаны күйетін жастар Қазақстанның құрама командасының ойындарын Ақтөбе жерінде де көргісі келеді. Ал облыстық дене шынықтыру және спорт басқармасының басшысы Ескендір Маханов Қобыланды батыр атындағы орталық стадион 1-ші қаңтардан бастап "Ақтөбе" футбол клубына берілетінін мәлімдеді. Бұл жаңалық жанкүйерлерді қуантып, бір серпілтіп тастады.