Ақтөбе облыстық өлкетану мұражайы жабылды. Жаңа жылдан бастап мекеме ақтөбеліктер мен қала қонақтарына  қызмет көрсетуді тоқтатты. Төтенше жағдайлар департаменті ғимараттан техникалық ақаулар тауып, істі сотқа жолдаған. Облыстық экономикалық ауданаралық соты мұражайды өрт қауіпсіздігі сақталмағаны үшін уақытша жапты. Облыстық тарихи өлкетану мұражайы орналасқан ғимарат 1967 жылы қолданысқа берілген. Онда 100 мыңға жуық жәдігер сақталған. Қараша айында болған тексеруден  кейін орталықтың өрт қауіпсіздігін сақтамағаны анықталған. Тоқ көздерінің дұрыс орналаспауы мен екінші қабатқа шығар жолдың ағаш тақтайшамен жабылғаны қауіпті деген сот шешімі шықты. Мұражай қоймасының  талапқа сай болмауына байланысты ондағы сақталған бұйымдар ішке тасылуда. Өлкенің тарихымен таныстырып жүрген мамандар бүгінде жөндеу жұмыстарын өз күштерімен қолға алған. Өрт қызметінің атап көрсеткен  ақаулары жөнделіп жатыр. Тарихи өлкетану мұражайында 7 зал бар. Ақпан айынан кейін ондағы табиғат залы жабылады. Мұражай әкімшілігі тексеруден  кейін  облыстың табиғатынан сыр шерткен залды құрбан етпек. Басқа амал жоқ. Қоймадағы заттар қораптармен үйіліп жатыр. Енді олар табиғат залында сақталатын болады. Ал басқа залдар биылға  тұспа-тұс келетін атаулы мерекелерге орай аман қалып отыр. ҰОС ардагерлерінің залы жеңістің 70 жылдығына орай, қазақ батырларының залы қазақ хандығының 550 жылдығына орай сақталғалы тұр. Ал мұражайға жаңа ғимарат салу мәселесі шешімін табар емес. Мұражай әкімшілігі ғиараттың орталықта болғанын қалайды. Бірақ, бұл ұсыныс жергілікті билік тарапынан қолдау таппай тұр.